________یہ ہندوستان ہے جاناں! ________

کوئی مظلوم گر بولے تو منہ پر ہاتھ رکھ دینا

غموں کی داستاں کھولے تو منہ پر ہاتھ رکھ دینا

یہاں انصاف بے معنی یہاں ظالم پنپتے ہیں

بکاؤ ہیں یہاں منصف سرِ بازار بکتے ہیں

یہاں قاتل کے ہاتھوں میں زمامِ کار ہوتی ہے

یہاں مظلوم کی گردن پہ ہی تلوار ہوتی ہے

یہاں پر عدل کا میزان بھی ظالم پہ جھکتا ہے

سزا مظلوم ہی ظالم کی یاں اکثر بھگتتا ہے

یہاں مظلوم پر ہی سینکڑوں الزام ہوتے ہیں

جو دنیا نے نہیں دیکھے یہاں وہ کام ہوتے ہیں

یہاں پر خون ریزی کا بھی اک کردار ہوتا ہے

جو ہے سب سے بڑا قاتل وہی سردار ہوتا ہے

یہاں مظلوم کی آواز کو اکثر دباتے ہیں

کہیں پر قتل کرتے ہیں کہیں زندہ جلاتے ہیں

یہاں دیدہ وروں کو عقل کے بیمار کہتے ہیں

جو ہوتے ہیں کسی قابل انھیں بیکار کہتے ہیں

یہاں پر اہل سیاست چین سے جینے نہیں دیتے

محبت پیار کی برکھا یہاں گرنے نہیں دیتے

یہ ہم وطنوں کے سینوں میں عداوت روز بھرتے ہیں

زباں ہے اتنی زہریلی کہ کالے ناگ ڈرتے ہیں

یہاں پر اپنا حق بھی مانگنا جرم عدالت ہے

یہاں پیشہ ورانہ جاہلوں کی ہی وکالت ہے

یہاں بہنوں کے آنچل کی کوئی قیمت نہیں ہوتی

یہاں اب ماؤں کی ممتا کی بھی وقعت نہیں ہوتی

یہاں جمہوریت اکثر غلامی میں بدلتی ہے

یہاں مظلوم پر بے خوف ہو کے گولی چلتی ہے

یہاں ڈاکو بھی دیکھو قوم کے معمار ہوتے ہیں

یہاں وہ بھی لٹیرے ہیں جو پہرے دار ہوتے ہیں

یہاں اکثر یتیموں کے نوالے چھینے جاتے ہیں

گھروں پر مار کر تالا حوالے چھینے جاتے ہیں

یہاں بیواؤں کی مجبوریوں کے دام لگتے ہیں

امیروں کو ہوس کے نام پر انعام ملتے ہیں

یہاں حوا کی بیٹی پر ہوس کے وار ہوتے ہیں

یہاں ناموس کے سودے سر ِ بازار ہوتے ہیں

غریبوں کی یہ حالت ہے کہ روٹی کو ترستے ہیں

یہاں انسان بھوکے ہیں مگر حیوان پُجتے ہیں

حکومت جب غریبوں کی حمایت چھوڑ دیتی ہے

تو پھر انسانیت فٹ پاتھ پر دم توڑ دیتی ہے

یہاں دیر وحرم بھی زیرِ احکام سیاست ہیں

یہاں ریشی منی ملا میں بھی کیا کیا وعداوت ہیں!

یہاں اب کیسے رہنا ہے کوئی آخر یہ بتلا دے ؟

ستم کب تک یہ سہنا ہے کوئی آخر یہ بتلا دے ؟

فضا مسموم ہے شام وسحر کچھ سوچ کر بولو

یہ ہندستان ہے جاناں ثمر کچھ سوچ کر بولو!

______ثمریاب ثمر_____

Milan Tomic

Hi. I’m Designer of Blog Magic. I’m CEO/Founder of ThemeXpose. I’m Creative Art Director, Web Designer, UI/UX Designer, Interaction Designer, Industrial Designer, Web Developer, Business Enthusiast, StartUp Enthusiast, Speaker, Writer and Photographer. Inspired to make things looks better.