غزل

دوزخ کو بہشت، گلزار امن، فردوس بریں، کیا لکھنا
بارود پلائی دھرتی کو، جنت کا نمونہ، کیا لکھنا

ہر طرف ہیں خونیں تصویریں، ہر طرف بلکتی آوازیں
ہر طرف سسکتی آہوں کو، بلبل کا ترانہ، کیا لکھنا

ہر طرف جکڑتی زنجیریں، ہر طرف لٹکتی شمشیریں
اس زنداں و مقتل کو ہمدم!خوشیوں کا جہاں کیا لکھنا

ہر طرف چمن میں ماتم ہے صیاد کی چیرہ دستی کا
ہر شاخ سے اٹھتے نالوں کو، گلبانگ بہاراں، کیا لکھنا

ہر ایک زباں  پر بندش ہے، ہر ایک قلم پر یورش ہے
یاں علم و ہنر کے رہزن ہیں، رہزن کو نگہباں کیا لکھنا

نفرت کا جہاں ہو چال چلن، الفت کا جہاں پر نام نہ ہو
کانٹوں سے بھری اس وادی کو، سرسبز گلستاں، کیا لکھنا

از حسن گودھروی